Den Ierfgroussherzog | Cour grand-ducale (2024)

De Prënz Guillaume Jean Joseph Marie, Prënz vu Lëtzebuerg, Prënz vun Nassau a Bourbon-Parma, ass den eelste Jong vum Grand-Duc Henri an der Grande-duch*esse Maria Teresa vu Lëtzebuerg.

Seng Bridder a Schwëstere sinn:

• de Prënz Félix
• de Prënz Louis
• d'Prinzessin Alexandra
• de Prënz Sébastien

Nodeems säi Papp de 7. Oktober 2000 op den Troun koum, huet de Prënz Guillaume den 18. Dezember 2000 den Eed ofgeluecht an ass doduerch offiziell Ierfgroussherzog ginn.

Fotoe vun der Prënzenhochzäit

De Prënz Guillaume an d'Prinzessin Stéphanie sinn Eltere vun zwee Jongen, dem Prënz Charles Jean Philippe Joseph Marie Guillaume, gebuer den 10. Mee 2020, an dem Prënz François Henri Luis Marie Guillaume, gebuer de 27. Mäerz 2023. Déi zwee Jonge sinn an der Maternité Grande-duch*esse Charlotte zu Lëtzebuerg op d'Welt komm.

De Prënz Guillaume ass zu Luerenzweiler an d'Primärschoul gaangen. Seng Studien huet hien am Lycée Robert Schuman zu Lëtzebuerg ugefaangen, éier hien duerno am Alter vu 16 Joer op den Institut Le Rosey souwéi op de Collège Alpin Beausoleil an der Schwäiz gaangen ass, wou hien 2001 säin Ofschlossdiplom krut. De Prënz Guillaume schwätzt fléissend Lëtzebuergesch, Franséisch, Däitsch, Englesch a Spuenesch.

Sou wéi et zanter Laangem Traditioun an der groussherzoglecher Famill ass, huet de Prënz Guillaume vu September 2001 bis August 2002 seng Ausbildung zum Offizéier op der Royal Military Academy Sandhurst RMAS (Kinneklech Militärakademie Sandhurst) mat Erfolleg absolvéiert.

De Prënz Guillaume gouf am Dezember 2002 als Offizéier vun der Lëtzebuerger Arméi vereedegt an dréit zur Zäit de Grad vum Colonel.

No engem Studium vun internationaler Politik an England mécht hie weider Studien a Frankräich, wou hien 2009 eng duebel Lizenz mat Auszeechnung an de Fächer Literatur- a Politikwëssenschaften op der Universitéit Angers kritt.

Parallel zu sengen Universitéitsstudien huet de Prënz Guillaume sech duerch verschidde Coursë mat der wirtschaftlecher a politescher Welt vertraut gemaach. Den Ierfgroussherzog huet an deem Kader och Stagë bei multinationalen Entreprisen, sou zum Beispill 2003 bei der Union chimique belge an 2004 bei der Deutsche Bank zu London gemaach. Am Joer 2005 gouf hien an déi verschidden Aktivitéite vun der spuenescher Néierloossung vum Grupp ArcelorMittal agefouert.

De Prënz Guillaume bereet sech als Trounfollger op seng spéider Roll vir. Durch seng Präsenz ënnerstëtzt hien och wirtschaftlech a sozial Engagementer vun der Lëtzebuerger Regierung.

Sou hëlt de Prënz Guillaume 2005 mam Premierminister a mam Ausseminister un der Millenium Conference vun de Vereenten Natiounen zu New York deel, där hiert Zil d'Eliminatioun vun extreemer Aarmut an der Welt war.

Duerch en Openthalt bei der europäescher Kommissioun a bei der permanenter Vertriedung vu Lëtzebuerg zu Bréissel am Joer 2012, konnt de Prënz seng Kenntnisser iwwer de Fonctionnement vun der Europäescher Unioun, de Verhandlungsprozesser an den institutionellen Ofleef verdéiwen. Hien huet ënner anerem um Conseil des affaires étrangères an um Comité politique et de sécurité (COPS) deelgeholl.

Vun 2018 bis 2019 absolvéiert de Prënz Guillaume e Studiegang um Royal College of Defence Studies (RCDS) zu London, fir zousätzlecht Fachwëssen en vue vu sengen zukünftegen Aufgaben als Staatschef ze kréien an domadder beschtméiglechst op seng spéider Responsabilitéite virbereet ze sinn.

Säin Engagement fir d'Natioun

Gläichzäiteg huet de Prënz Guillaume ugefaangen, senge Representatiounsflichten nozegoen. Dobäi geet et zemools ëm d'Promotioun vu Lëtzebuerg am Ausland, awer och ëm d'Ënnerstëtzung vu Betriber a Wirtschaftsinitiativen hei am Land.

Säin Engagement am Ausland

Am Mäerz 2001 huet de Prënz Guillaume d'Éierepresidence vum Board of Economic Development vum Grand-Duché ugeholl, enger Agence fir Wirtschaftsfërderung an –entwécklung, déi haut Trade & Investment Board heescht.

Am Alter vun 19 Joer presidéiert hie scho seng éischt Wirtschaftsmissiounen, déi hien an d'Republik Korea, an Italien souwéi an Amerika gefouert hunn.

Houfreg der Natioun ze déngen, gëtt den Ierfgroussherzog reegelméisseg agelueden, de Grand-Duché op wirtschaftlechen a finanzielle Prospektiounsmissiounen am Ausland ze vertrieden, déi hien a sëlleg Länner an Europa, Amerika, Asien an Afrika féieren.

Zanter 2004 iwwerreecht den Ierfgroussherzog a senger Qualitéit als Éierepresident vum Trade & Investment Board d'Auszeechnung Luxembourg-American Business Award zu New York.

Säin Engagement zu Lëtzebuerg

Am Kader vun der wirtschaftlecher Promotioun vu Lëtzebuerg hëlt de Prënz Guillaume dacks un Evenementer vu Luxembourg Trade & Invest deel. Gläichzäiteg ass hie reegelméisseg bei Aktivitéite vun der Handelskummer, Luxembourg for Finance an der Fedil (Fédération des Industriels Luxembourgeois) derbäi. Domadder dréit de Prënz, zesumme mat de wirtschaftlechen Acteuren, zur Visibilitéit an zur Attraktivitéit vum Land bäi.

Zanter lo scho 50 Joer gëtt déi feierlech Zeremonie vun der Iwwerreechung vum Meeschterbréif vun der Handwierkskummer vun engem Member vun der groussherzoglecher Famill presidéiert. Eng Éier, déi dem Prënz Guillaume zanter 2004 zousteet.

Den Ierfgroussherzog ass donieft och säit 2015 bei der Diplomiwwerreechung vun der Handelskummer present.

Seng Ënnerstëtzung fir d'Acteure vum Wunnengsmaart weist hien, andeems hien all Joer d'Home & Living Expo besicht.

Zanter dem 24. Juni 2005 ass den Ierfgroussherzog Member vum Staatsrot. Hien hëlt reegelméisseg un de Plenarsëtzunge souwéi u verschiddene Kommissiounen deel, wat him erméiglecht, seng Kenntnisser iwwer institutionell a legislativ Ofleef am Land ze verdéiwen.

Säit senger Nominatioun zum Ierfgroussherzog huet de Prënz Guillaume déi groussherzoglech Koppel op sëlleg representativ an institutionell Aktivitéite begleet, wéi op d'Feierlechkeeten am Kader vum Nationalfeierdag, d'Neijooschaudienzen, déi den nationalen Autoritéiten accordéiert goufen, souwéi op vill Staats- an offizielle Visitten.

De Prënz gesäit et als seng Flicht, fir d'Erënnerungskultur héichzehalen. Sou hunn d'Gedenkfeieren zum Zweete Weltkrich duerch d'Erzielunge vu sengem Grousspapp, dem Grand-Duc Jean, e ganz besonnesche Stellewäert. Zanter senger Vereedegung huet de Prënz Guillaume un nationalen an internationale Gedenkfeieren zum Zweete Weltkrich deelgeholl, wéi un der Gedenkfeier zum 70. Joresdag vun der Befreiung vu Veianen, vum Konzentratiounslager Auschwitz-Birkenau a vum Konzentratiounslager Mauthausen am Joer 2015. Hien huet eng Bildungs-, Kultur- a Gedenkrees mat Zäitzeie vun der zweeter Generatioun vun der ASBL Krakau/Auschwitz am Joer 2016 begleet. Am Joer 2019 huet hien un de Gedenkfeieren zum 75. Joresdag vun der Ardennenoffensiv um Schumannseck deelgeholl.

Als Member vun der groussherzoglecher Famill dréit de Prënz Guillaume de "Chevalier de l'Ordre du Lion d'or de la Maison de Nassau", d'"Grand-Croix de l'Ordre de Mérite civil et militaire d'Adolphe de Nassau" an d'"Grand-Croix de l'Ordre de la Couronne de chêne".

Den Ierfgroussherzog huet de "Grand Officier de la Légion d'honneur" zanter dem Joer 2015.

2018 huet den John E. Dolibois European Center vun der Miami University dem Ierfgroussherzog déi héchsten Auszeechnung, den Doktertitel honoris causa, fir säin ëffentlecht a soziaalt Engagement iwwerreecht.

De Prënz Guillaume an d'Prinzessin Stéphanie iwwerhuele vill Aktivitéiten zesummen.

Hir Engagementer als Koppel spigelen dacks hir gemeinsam Interessien erëm. D'Fërderung vun der Lëtzebuerger Handwierkskonscht ass ee Beispill dofir. Zesumme mat senger Fra, der Grënnerin an Éierepresidentin vun der ASBL De Mains de Maîtres, setze si sech fir d'Promotioun vum Lëtzebuerger Konschthandwierk an.

Nieft de wirtschaftlechen Aktivitéite bedeelegen den Ierfgroussherzog an d'Ierfgroussherzogin sech aktiv um kulturelle Liewen zu Lëtzebuerg. Si gi reegelméisseg op Concerten, Salonen a bei Kënschtlerkreesser oder besichen Ausstellungen a verschiddene Lëtzebuerger Muséeën.

Vu sengem Grousspapp a Papp ass de Prënz Guillaume encouragéiert ginn d'Natur ze entdecken an ze schützen. Hien ass säit senger Kandheet Member vun de Scouten. Am Summer 1997 huet hien als jonke Scout mat vill Begeeschterung un engem humanitäre Camp am Nepal deelgeholl, vun deem him onvergiesslech Erënnerunge bleiwen. Hien huet do un engem Opforstungsprojet souwéi un aneren Aktiounen zu Gonschte vun den am meeschte benodeelegte Communautéite matgeschafft.

Am Joer 2017 ass den Ierfgroussherzog dem Verwaltungsrot vun der World Scout Foundation bäigetrueden, fir d'Scoutsbeweegung weltwäit ze ënnerstëtzen. Am September 2021 huet hien de Poste vum Virsëtz vun der World Scout Foundation ugeholl. Zu Lëtzebuerg huet de Prënz Guillaume mat Houfert den Titel vum Chef-Scout nom Doud vum Grand-Duc Jean, deen dësen Titel zanter 1945 gedroen huet, iwwerholl an huet säi Verspriechen am Oktober 2019 viru bal 3.000 Scouten am Stater Park ofgeluecht.

En savoir plus son engagement scout

• Accéder à la page dédiée

Hie befaasst sech mat villen Initiativen zur Ënnerstëtzung vun der Jugend, besonnesch am Beräich vun der allgemenger a berufflecher Ausbildung. An dësem Kontext huet hien ënner anerem deelgeholl:

• um europäeschen Treffe vun de Lëtzebuerger Studenten (REEL – Réunion européenne des étudiants luxembourgeois) am Joer 2003,
• um Unesco-Weltjugenddag 2005,
• un de REEL-Debatten zu Stroossbuerg am Joer 2013.

Hien accordéiert der Centrale des auberges de jeunesse am Joer 2001 säin Haut-Patronage. Ausserdeem huet hien zanter 2020 den Haut-Patronage vun de Jonke Fuerscher Lëtzebuerg iwwerholl.

D'Entreprenariat ass dem Ierfgroussherzog immens wichteg, dofir huet hien 2013 den Haut-Patronage vun de Jonken Entrepreneure Lëtzebuerg an 2017 vun der Fédération des Jeunes Dirigeants d'Entreprise iwwerholl.

Den Ierfgroussherzog interesséiert sech besonnesch fir "Social Business" an d'Entwécklungen am Kader vun der Mikrofinanz, zwee villverspriechend Instrumenter am Kampf géint d'Aarmut. Hien hëlt an deem Kader u verschiddenen "Global Grameen Meetings", der Alfi Spring Conference am Joer 2015 souwéi u weidere Manifestatiounen an dësem Beräich deel.

No méi wéi 10 Joer (2000-2011) als President vum Verwaltungsrot vun der Fondatioun Kräizbierg, déi sech fir Mënsche mat Behënnerung asëtzt, krut den Ierfgroussherzog am Mäerz 2011 den Titel vum Éierepresident. De Prënz Guillaume ass dëser Stëftung enk verbonnen a schätzt ënner anerem hiert Konzept vun der sozialer a berufflecher Integratioun.

Zanter 2017 huet hien den Haut-Patronage vu Special Olympics Lëtzebuerg, zanter dem Joer 2002 vun der nationaler Vereenegung fir Verkéiersaffer, an hien ass nieft sengen Elteren a senger Fra och nach Member am Verwaltungsrot vun der Fondation du Grand-Duc et de la Grande-duch*esse.

Am Joer 2020 iwwerhëlt den Ierfgroussherzog d'Funktioun vumÉieregouverneur vum Lions District 113 Luxembourg, déi virdru vum Grand-Duc Jean vun 1967 bis zu sengem Doud am Joer 2019 assuréiert gouf.

De Prënz Guillaume ass intresséiert u Politik, Wirtschaft, Philosophie a Geschicht, an hie liest am léifsten Autobiografien, philosophesch Analyse souwéi och historesch Romaner. Zanter dem 18. Januar 2016 ass den Ierfgroussherzog Member vum Verwaltungsrot vun der Europäischen Stiftung Kaiserdom zu Speyer, déi sech fir d'Erhale vun der bal dausend Joer aler Kathedral zu Speyer asetzt.

Den Ierfgroussherzog ass frou mat souwuel klassescher wéi moderner Musek. Hien ass passionéierte Gittarspiller. Als Kand war hie Member vum Pueri Cantores Chouer vu Lëtzebuerg. De Prënz huet dem Lëtzebuerger Kammerorchester (OCL – Orchestre de chambre du Luxembourg) souwéi och dem Jugendorchester vun der Europäescher Unioun säin Haut-Patronage accordéiert. Vun den duerstellende Kënscht huet hien den Theater besonnesch gären.